أنا مش عارفه ابدأ كلامي منين………
حكايتي تتلخص في جملتين….
بداية كانت كلها طموح للمستقبل ….. ونهاية كلها تعب وحزن وهموم ……
حزني وتعبي النفسي بدأ من مرحلة الثانوية لما اتحرمت من إني أدخل الكلية إلا بحلم بيها…..
فدخلت كلية تجارة وقولت أكيد ربنا هيعوضني…..فقولت لنفسي ذاكري واتعبي علشان تطلعي بتقدير امتياز وأرتب على دفعتي وأكون حاجة مشرفة لبلدي ولوالدي ووالدتي إلا تعبوا علشاني إلا كانوا بيحرموا نفسهم من أنهم يعيشوا عيشة كويسة في سبيل توفير أجرة المواصلات علشان أكمل الكلية وأكمل مسيرتي التعليمية…… وبالفعل كملت  وطلعت بتقدير امتياز وكمان مرتبة على دفعتي وفرحت أبويا وأمي واخدت دبلومات كمان …….وما كنتش أعرف إن الواقع هيقتلني من جوايا وهيكون مظلم كده….
ما كنتش أعرف إن الواقع هيكون مخيف كده وصعب عليا……
قدمت في البنك الزراعي واتقبلت بس للأسف اتلغت المسابقة وقولت لنفسي الخيرة فيما اختاره الله…..
ونزلت مسابقة الضرائب إلا كنت منتظرها من سنين وعلشان السن معدي شهر عن شرط سن المسابقة اتحرمت من إني أقدم فيها وقولت أكيد ربنا هيعوضني ومش هيسبني أفشل في كل مسابقة أقدم فيها……
فنزلت هيئة النيابة الإدارية مسابقة وظيفة باحث ثالت تنمية إدارية وقدمت وللأسف برضوا ما حصلش نصيب……فقدمت في وظيفة كاتب رابع وفعلاً نجحت في الاختبار واخدت تقدير امتياز فقولت الحمد لله إنه ربنا أكرمني وما كنتش أعرف إنه في واقع مؤلم منتظرني وهو إن المسابقة اتلغت …..ساعتها حسيت بأن روحي بتموت لما بشوف مستقبلي بيضيع بسبب شرط السن إلا بتشترطه كل مسابقة ومش هقدر أقدم في أي مسابقات تاني كده ومش قادرة أحصل على حافز تعبي ومجهودي وهو إني ابقي في وظيفة محترمة اضع كل مجهودي فيها واشتغل بما يرضي ربنا سبحانه وتعالى وأكون في خدمة وطني……
فالحمد لله عرفت بالصدفة إن أصحابي بيعملوا قضية لوظيفة كاتب رابع وبالفعل ربنا أكرمني واخدت حكم وقولت الحمد لله ربنا نصرني وهتوظف…….
لكن المؤلم إنه ليا كذا سنة حاصلة على حكم ولم اتعين إلى الآن……..
أقسم بالله أنا ضيعت عمري في مسيرة التعليم ولم أعيش أيام حياتي والله كنت بذاكر وأنا بأكل خوفاً من تضييع وقتي……..وحاجات كتير حسيت بيها ونفسي اقولها بس مش عايزة كلامي يكون طويل عليكم أكتر من كده …..
بالله عليكم……
أنا نفسي اتوظف واصرف على نفسي وعلى وابويا وأمي إلا كبروا في السن ومش قادرين يواجهوا ظروف المعيشة إلا كل يوم الأسعار بتزيد ومش عارفه أجهز نفسي أنا ليا أربع سنين مخطوبة ومش قادرة أجهز نفسي بسبب ظروفنا صعبة ربنا يعلم إني عايشة ازاي والله نفسي فرحة تدخل قلبي ذي البنات…….
كل إلا بطلبه من هيئة النيابة الإدارية أن تنظر إلينا نظرة رأفة وشفقة علينا وتنفذ أحكام كاتب رابع علشان أقدر أواجه ظروف المعيشة وأقدر أكمل حياتي إن شاء الله……